Meiri verðmæti þrátt fyrir minni afla
Aflaverðmæti úr sjó var tæpir 14,3 milljarðar í mars, sem er 2,3% aukning samanborið við mars 2018. Verðmæti botnfiskaflans var tæpir 12 milljarðar og jókst um 21,1%. Af botnfisktegundum nam verðmæti þorskaflans 8 milljörðum sem er aukning um 1,4 milljarða samanborið við mars 2018. Verðmæti ýsuafla nam rúmlega 1,4 milljörðum samanborið við 820 milljónir í mars 2018.
Af uppsjávartegundum veiddist eingöngu kolmunni en aflaverðmæti hans nam um 1,7 milljörðum samanborið við 445 milljónir í mars 2018. Engin loðna veiddist í mars en aflaverðmæti hennar nam tæpum 2,8 milljörðum í mars 2018. Aflaverðmæti flatfisktegunda var rúmar 655 milljónir samanborið við tæpar 820 milljónir í mars 2018.
Verðmæti afla sem seldur var til eigin vinnslu innanlands var rúmir 8,3 milljarðar. Verðmæti sjófrysts afla nam 3,2 milljörðum og verðmæti afla sem fór á fiskmarkaði til vinnslu innanlands var rúmur 2,1 milljarður.
Á 12 mánaða tímabili, frá apríl 2018 til mars 2019, nam aflaverðmæti úr sjó tæplega 132 milljörðum króna sem er 10,4% aukning miðað við sama tímabil ári fyrr.
Hagtölur sem birtast í þessari fréttatilkynningu eru bráðabirgðatölur. Þær byggjast á gögnum um verðmæti fyrstu sölu landaðs afla sem Fiskistofa safnar saman.
| Verðmæti afla 2018–2019 | ||||||
| Milljónir króna | Mars | Apríl-mars | ||||
| 2018 | 2019 | % | 2017-2018 | 2018-2019 | % | |
| Verðmæti alls | 13.971,6 | 14.296,7 | 2,3 | 119.141,8 | 131.529,2 | 10,4 |
| Botnfiskur | 9.830,8 | 11.903,3 | 21,1 | 84.860,7 | 97.964,7 | 15,4 |
| Þorskur | 6.627,2 | 8.044,0 | 21,4 | 54.144,7 | 61.689,2 | 13,9 |
| Ýsa | 820,7 | 1.423,1 | 73,4 | 8.761,5 | 12.732,2 | 45,3 |
| Ufsi | 726,3 | 716,2 | -1,4 | 7.311,0 | 8.304,0 | 13,6 |
| Karfi | 1.153,7 | 1.179,7 | 2,3 | 10.069,8 | 10.541,0 | 4,7 |
| Úthafskarfi | 0,0 | 0,0 | – | 333,3 | 218,8 | -34,3 |
| Annar botnfiskur | 502,8 | 540,4 | 7,5 | 4.240,3 | 4.479,5 | 5,6 |
| Flatfiskafli | 819,7 | 655,1 | -20,1 | 8.383,5 | 10.560,2 | 26,0 |
| Uppsjávarafli | 3.195,8 | 1.682,7 | -47,3 | 23.506,8 | 20.378,4 | -13,3 |
| Síld | 0,0 | 0,0 | – | 4.504,4 | 4.655,9 | 3,4 |
| Loðna | 2.750,5 | 0,0 | – | 5.891,7 | 0,0 | – |
| Kolmunni | 445,3 | 1.682,7 | 277,9 | 4.585,2 | 8.215,8 | 79,2 |
| Makríll | 0,0 | 0,0 | – | 8.525,4 | 7.506,8 | -11,9 |
| Annar uppsjávarafli | 0,0 | 0,0 | – | 0,0 | 0,0 | – |
| Skel- og krabbadýraafli | 125,3 | 55,6 | -55,6 | 2.390,8 | 2.625,9 | 9,8 |
| Humar | 26,0 | 1,9 | -92,6 | 828,7 | 543,4 | -34,4 |
| Rækja | 76,8 | 34,1 | -55,6 | 1.184,5 | 1.508,7 | 27,4 |
| Annar skel- og krabbadýrafli | 22,6 | 19,6 | -13,0 | 377,5 | 573,8 | 52,0 |
| Annar afli | 0,0 | 0,0 | – | 0,0 | 0,0 | – |
Ljósmynd Hjörtur Gíslason.
