-->

Mikill aflasamdráttur í mars

Fiskafli íslenskra skipa dróst saman um 14,9% á föstu verði í mars 2014 samanborið við marsmánuð árið áður. Í tonnum talið dróst afli saman um 53,6% og hefur mikill samdráttur í loðnuafla þar mest að segja. Þetta kemur fram í tölum Hagstofu Íslands.
Botnfiskafli jókst í mars um 10% miðað við mars í fyrra. Uppsjávarafli var mun minni í mars í ár en í sama mánuði 213, þrátt fyrir mikla hlutfallslega aukningu í síldveiði og veiði á kolmunna. Þar sem magnvísitalan tekur mið af verðhlutföllum milli fisktegunda og botnfiskaflinn er verðmætari en uppsjávaraflinn er samdráttur aflans á föstu verði er mun lægri í prósentum talið heldur en samdráttur aflans í tonnum.
Í marsmánuði, var afli uppsjávartegunda aðeins 43.712 tonn nú, en 158.346 tonn í sama mánuði í fyrra. Þar ræður slök loðnuvertíð mestu, því loðnuafli var aðeins um 36.000 tonn nú, en ríflega 157.000 tonn í fyrra. Nánast engin veiði var á kolmunna og síld í marsmánuði í fyrra, en nú veiddust 2.732 tonn af síld og 4.948 tonn af kolmunna.  Þorskafli jókst í marsmánuði um 18% og varð alls 30.495 tonn. Meira veiddist ennfremur af ýsu og ufsa, en minna af karfa.