Minni afli skilar meiri verðmætum

Aflaverðmæti úr sjó var 7,7 milljarðar í júní, sem er 1,1% aukning samanborið við júní 2018. Verðmæti botnfiskaflans nam tæpum 6,3 milljörðum og jókst um 8,3%. Af botnfisktegundum nam verðmæti þorskaflans 3,8 milljörðum sem er 6,1% meira en í júní 2018. Verðmæti flatfiskafla var rúmir 1,2 milljarðar sem er 8,2% minna en í fyrra. Verðmæti skel- og krabbadýra nam 220 milljónum sem er 24% samdráttur miðað við júní 2018.

Verðmæti afla sem seldur var í beinni sölu útgerða til vinnslu innanlands nam tæpum 3,4 milljörðum. Verðmæti sjófrysts afla nam rúmum 1,9 milljörðum og verðmæti afla sem seldur var á markað til vinnslu innanlands nam rúmum 1,8 milljörðum. Á 12 mánaða tímabili, frá júlí 2018 til júní 2019, nam aflaverðmæti úr sjó 136 milljörðum króna, sem er 10,5% aukning miðað við sama tímabil ári fyrr samkvæmt upplýsingum frá Hagstofu Íslands.

Þetta er athyglisvert í ljósi þess að fiskafli dróst saman um  þriðjung í mánuðinum. Mestu munar að enginn uppsjávarfiskur barst þá að landi, en sá afli var tæp 11% í sama mánuði árið áður. Þá dróst botnfiskafli saman um 12% og þorskafli um 17%. Þar sem svipað verðmæti fæst fyrir þriðjungi minni afla má draga þá ályktun að fiskverð í júní nú hafi verið mun hærra en í fyrra. Hlutfall verðmeiri tegunda af heildinni er nú meira en í fyrra, þar sem enginn uppsjávarfiskur veiddist í júní nú. Sem dæmi um breytinguna var þorskafli í júnúní nú 14.835 tonn, en 17.933 tonn í fyrra. Það er fall um 17% en engu að síður hækkar verðmæti landaðs þorskafla um 6,1%

Hagtölur sem birtast í þessari fréttatilkynningu eru bráðabirgðatölur. Þær byggjast á gögnum um verðmæti fyrstu sölu landaðs afla sem Fiskistofa safnar saman.