Ný staða – óljós áhrif

„Alþingi samþykkti á dögunum ný lög um fiskeldi og gjaldtöku af atvinnugreininni. SFS gerði margháttaðar athugasemdir við frumvörpin, sem ekki var tekið tillit til. Æskilegt hefði verið að leggja meiri vinnu í grunnþætti og stefnumótun fyrir greinina til framtíðar. Því er það skoðun SFS að með setningu laganna hafi mikilsverðum þjóðhagslegum hagsmunum verið fórnað.“

Svo segir í nýrri færslu á heimasíðu Samtaka fyrirtækja í sjávarútvegi. Þar segir ennfremur: „Það er óskiljanlegt á öllum tímum, ekki síst nú þegar haft er í huga að fiskeldi er farið að skapa tugmilljarða tekjur. Það er ekki vanþörf á þegar við þjóðarbúinu blasir efnahagslegur samdráttur. Þegar þrengt er að rekstri fyrirtækja með þeim hætti sem boðað er í lögunum er hætt við að fyrirtæki muni halda að sér höndum í fjárfestingu. Það mun bitna á þjóðarhag og ekki síst íbúum sveitarfélaga þar sem fiskeldi hefur verið að ná sér á strik og haft mikil og jákvæð áhrif. Það er miður.

Fiskeldi á Íslandi hefur verið byggt hægt og rólega upp á undanförnum árum samkvæmt ströngustu skilyrðum. Alþingi samþykkti þegar árið 2004 að svæðisskipta fiskeldi í sjó þannig að skilgreind voru eldissvæði fjarri helstu laxveiðiám landsins. Ísland er líka eina landið í heiminum þar sem notast er við svokallað áhættumat vegna mögulegrar erfðablöndunar. Það er gert til að reyna að tryggja lágmarksáhrif eldis á aðra stofna.

Þó ekki sé ljóst á þessari stundu hvaða áhrif nýju lögin muni hafa á fyrirhugaða uppbyggingu á fiskeldi er veruleikinn sem nú blasir við sá veruleiki sem greinin verður að vinna í. Íslensk fiskeldisfyrirtæki hafa sýnt þrautseigju, verið gætin og framsýn á undanförnum árum. Vonandi verður ekki lát á því.“