Sigruðu í sjöundu keppni Vitans

Vitinn, hugmyndasamkeppni sjávarútvegsins, var haldin fyrir nemendur Háskólans í Reykjavík dagana 19.-21. janúar. Keppnin er samstarfsverkefni Samtaka fyrirtækja í sjávarútvegi og HR með dyggum stuðningi Icelandair Cargo. Í frétt SFS segir að þetta sé í sjöunda sinn sem keppnin er haldin en í ár unnu keppendur að lausnum og þróun fyrir Síldarvinnsluna.

„Keppnin í ár var einstaklega hörð þar sem öll lið komu fram með góðar hugmyndir og ríkti mikil ánægja hjá dómnefnd með afrakstur nemenda sem komu úr flestum deildum HR,“ segir í frétt SFS en vinningsliðið í ár var skipað þeim Jakobi Frey Sveinssyni, Hákoni Hákonarssyni, Sæþóri Orrasyni, Birgittu Rós Ásgrímsdóttur og Pedro Þór Roismann Guðmundssyni. Sneri verkefni þeirra að síldarvinnslu og síldarafurðum á Bandaríkjamarkaði. Sigurvegarar Vitans fara fyrir hönd HR á Sjávarútvegssýninguna í Boston nú í vor og heimsækja einnig Síldarvinnsluna á Neskaupsstað.

Á meðfylgjandi mynd eru keppendur í Vitanum 2023 ásamt fulltrúum aðstandenda keppninnar.