-->

Sólberg með um 2.500 tonn af þorski úr Barentshafi

Frystitogarinn Sólberg ÓF hefur nú sótt ríflega 2.500 tonn af þorski auk meðafla í öðrum tegundum í Barentshafið. Það hefur þar með lokið kvóta sínum innan lögsögu Noregs, þar tekin voru 1.500 tonn og sömuleiðis innan rússnesku lögsögunnar þar sem tekin voru 1.080 tonn. Þá hefur Örfirisey sótt kvóta sinn í norskri lögsögu, sem er 1.163 tonn af þorski samkvæmt aflastöðulista Fiskistofu.

Þorskkvóti okkar innan norsku lögsögunnar er nú tæplega 2.700 tonn og standa eftir af honum 85 tonn. Það eru eingöngu Sólberg og Örfirisey stundaveiðar þar á þessu ári, en heimildir annarra skipa hafa verið fluttar yfir á þessi tvö skip.

Í fyrra var kvótinn í norsku lögsögunni tæplega 5.600 tonn og náðist hann að mestu leyti. Sex skip sóttu þá afla á þessar slóðir. Þrjú þeirra fóru yfir þúsund tonn. Sólberg var með mest, tæplega 1.500 tonn, Kleifaberg var með tæp 1.100 tonn og Örfirisey með rétt rúm 1.000 tonn.

Skýringin á því hve lítill þorskkvóti okkar í norsku lögsögunni er nú, er sú að engin loðnuveiði var við Ísland, hvorki í ár né í fyrra. Heimildir okkar til þorskveiða innan lögsögu Noregs í Barentshafi byggjast að hluta til á því að Norðmenn fái loðnukvóta við Ísland á móti. Fái Norðmenn enga loðnu minnkar þorskvóti okkar innan lögsögu þeirra.

Þorskveiðiheimildir okkar í Rússasjó eru nú samtals tæplega 5.700 tonn. Úthlutun samkvæmt Smugusamningunum svokölluðu er 3.366 tonn, en til viðbótar koma kaup á heimildum til veiða á 2.321 tonni af þorski auk meðafla.

Eins og áður sagði er Sólbergið eina skipið sem landað hefur afla úr Rússasjónum samkvæmt aflastöðulista Fiskistofu, en eftir færslur heimilda milli skipa eru 5 skip skráð með veiðiheimildir þar. Hin skipin eru Blængur með 1.500 tonna kvóta, Örfirisey og Vigri með um 1.000 tonn og Arnar með tæplega 1.000 tonn.

Á síðasta ári sóttu sex íslensk skip tæplega 5.600 tonn af þorski í Rússasjóinn. Sólberg var með mest, 1.200 tonn, Blængur kom næst með 1.100 tonn, þá Örfirisey með 1.050, Vigri með 900 tonn, Kleifaberg 770 tonn og Arnar með 490 tonn.

Tengdar færslur

thumbnail
hover

13 ára háseti með félaga sínum...

Maður vikunnar starfar í þeirri atvinnugrein sem mestur vöxtur er í um þessar mundir og hefur hleypt lífi í margar byggðir sem átt...

thumbnail
hover

Brim tekur þátt í Síminn Cyclothon

Brim tekur þátt í Síminn Cyclothon keppninni sem hófst í gær við Egilshöll. Keppnin er boðhjólakeppni þar sem átta manna lið ...

thumbnail
hover

Tæp 150.000 tonn af kolmunna komin...

Hoffell SU er nú aflahæst á kolmunnaveiðum frá áramótum. Samkvæmt aflastöðulista Fiskistofu hefur Hoffellið landað 17.176 tonnum...