Strandveiðibáti bjargað

Áhöfnin á TF-GRO, þyrlu Landhelgisgæslunnar, var kölluð út á þriðja tímanum í gær vegna vélarvana strandveiðibáts sem rak að skeri við Ingólfsgrunn á Húnaflóa. Þyrlan var á flugi við Snæfellsnes þegar útkallið barst stjórnstöð Landhelgisgæslunnar. Annar strandveiðibátur í grenndinni var einnig beðinn um að halda á staðinn til aðstoðar. Einn var um borð í bátnum og tókst honum að setja akkeri bátsins út sem kom í veg fyrir að báturinn steytti á skerinu.

Þyrla Landhelgisgæslunnar kom á svæðið þegar klukkuna vantaði fimm mínútur í þrjú. Þyrlan var til taks á meðan báturinn var tekinn í tog af strandveiðibátnum sem kom til aðstoðar. Vel gekk að koma línu á milli bátanna en þeir héldu á Drangsnes.

Þetta var í annað sinn í gær sem þyrlusveit Landhelgisgæslunnar var kölluð út en skömmu fyrir hádegi var óskað eftir þyrlu vegna manns í sjónum við Álftanes. Maðurinn fannst um það leyti sem þyrlan var að hefja sig til flugs frá Reykjavíkurflugvelli.