-->

Svipað verðmæti útfluttra sjávarafurða

Útflutningsverðmæti sjávarafurða nam 21,5 milljörðum króna í febrúar samkvæmt fyrstu bráðabirgðatölum Hagstofunnar sem birtar voru í gærmorgun. Það er um 9% aukning í krónum talið miðað við febrúar í fyrra. Í erlendri mynt mælist hins vegar lítilsháttar samdráttur vegna lækkunar á gengi krónunnar á tímabilinu, eða sem nemur tæpu 1%.

„Þróunin er nokkuð misjöfn á milli afurðaflokka eins og alla jafnan er. Þannig var ágætis aukning í útflutningsverðmætum á heilum frystum fiski á milli ára í febrúar, eða sem nemur um 18% í erlendri mynt. Eins var dágóð aukning á útflutningsverðmætum ferskra sjávarafurða á tímabilinu, eða rúmlega 14% aukning á sama kvarða. Voru ferskar afurðir um 28% af útflutningsverðmætum sjávarafurða alls í febrúar, en það hlutfall hefur ekki áður mælst svo hátt í þeim mánuði. Aukin hlutdeild ferskra afurða er í takti við þá þróun sem verið hefur undanfarin ár sem felst í aukinni áherslu íslenskra sjávarútvegsfyrirtækja á ferskar afurðir. Af einstaka afurðaflokkum var samdrátturinn á milli ára mestur í útflutningi á rækju og svo fiskimjöli. Var útflutningsverðmæti rækju rúmlega 72% minna í erlendri mynt nú í febrúar en í sama mánuði í fyrra og verðmæti fiskimjöls um 59% minna,“ segir um gang mála hjá Samtökum fyrirtækja í sjávarútvegi.

Tæplega 8% samdráttur á milli ára
Sé tekið mið af fyrstu tveimur mánuðum ársins er útflutningsverðmæti sjávarafurða komið í tæpa 39 milljarða króna. Í krónum talið er um 2% aukningu að ræða en á föstu gengi mælist hins vegar samdráttur upp á tæp 8%. Hefur útflutningsverðmæti langflestra afurðaflokka dregist saman á milli ára, það er að verðmæti ferskra afurða, lýsis og svo annarra sjávarafurða undanskyldum. Í janúar hafði hvort tveggja verið samdráttur í magni útfluttra afurða á milli ára og eins höfðu langflestar afurðir lækkað í verði á tímabilinu í erlendri mynt. Ekki er hægt að greina slík áhrif fyrir febrúar en ætla má að svipuð þróun hafi verið upp á teningnum. Sjávarafurðir voru alls um 38% af verðmæti vöruútflutnings á tímabilinu, sem er svipað og það hefur verið að jafnaði undanfarinn áratug.

 

Attachments

Tengdar færslur

thumbnail
hover

Virkt ábendingarkerfi  hjá Faxaflóahöfnum

Virkt ábendingarkerfi hefur verið hjá Faxaflóahöfnum allt frá árinu 2016. Í gegnum kerfið er unnið að umbótaverkefnum sem leiða...

thumbnail
hover

Ertu öruggur um borð?

Vinnslustöðin, FISK Seafood og VÍS hafa hrundið af stokkum átaksverkefni sem ætlað er að beina kastljósum að öryggismálum á ski...

thumbnail
hover

Síldin sækir til vesturs 

Mun meira var að sjá af norsk-íslenskri síld og kolmunna í nýafstöðnum rannsóknarleiðangri færeyska rannsóknaskipsins Jákups Sv...