-->

„Það er víða öskrað á síld“

Lokið var við að landa 390 tonnum af síld úr Bjarna Ólafssyni AK í Neskaupstað síðdegis í gær. Þá var röðin komin að Berki NK sem kominn var með 1.400 tonn. Heimasíða Síldarvinnslunnar ræddi við Hjörvar Hjálmarsson, skipstjóra á Berki, og spurði fyrst hvar aflinn hefði fengist.

„Við byrjuðum á að taka eitt hol í Norðfjarðardýpinu. Þar fékkst ágæt síld en okkur þótti hún heldur smá svo við færðum okkur norðar. Við tókum síðan megnið af aflanum á Glettinganesflakinu. Þar fékkst síld sem var 360-370 gr. meðalþyngd og hentar afar vel til vinnslu. Það var töluvert af síld að sjá þarna á Glettinganesflakinu og einnig á Héraðsflóadýpinu. Það var bara býsna líflegt á þessum slóðum. Mér líst ágætlega á upphaf þessarar síldarvertíðar, hún fer vel af stað,“ segir Hjörvar.

Í gærmorgun var lokið við að vinna úr Beiti NK en hann kom með rúmlega 200 tonn af makríl og tæplega 500 tonn af síld. Beitir heldur á ný til síldveiða í dag.

Vinnsla á síldinni gengur afar vel í fiskiðjuveri Síldarvinnslunnar. Jón Gunnar Sigurjónsson yfirverkstjóri segir að þar séu unnin 700-800 tonn á sólarhring. „Við erum að fá mjög góða síld og erum að upplifa bullandi síldarvertíð. Afköstin fara eftir því hvað er verið að vinna. Stundum heilfrystum við og stundum er flakað og stundum er hvor tveggja gert. Þetta fer eftir því hvað markaðurinn vill. Síldarmarkaðir eru góðir núna. Það er víða öskrað á síld,“ segir Jón Gunnar.
ljósmynd Helgi Freyr Ólason.

Tengdar færslur

thumbnail
hover

Vilja láta rannsaka hvort útgerðin svíki...

Formenn þriggja stéttafélaga sjómanna vilja að kannað verði hvort verðmæti sjávarafurða hækki óeðlilega meðan verið er að f...

thumbnail
hover

Sjávarútvegsskólinn kominn með nema eftir árs...

Gró Sjávarútvegsskóli sem starfar undir hatti UNESCO hefur fengið nema að nýju eftir árs hlé vegna Covid19. Þetta er stærsti hóp...

thumbnail
hover

Mikið um þörungablóma fyrir austan

Þörungablómi fyrir austan virðist óvenju mikill miðað við árstíma. Hafrannsóknastofnun hafa borist fregnir af blóðrauðum sjó ...