Tveir stærstu sjóðirnir sem eiga í HB Granda óákveðnir
LSR og Lífeyrissjóður verzlunarmanna, sem eru stærstu hluthafar HB Granda að Útgerðarfélagi Reykjavíkur frátöldu, hafa ekki ákveðið hvort þeir samþykki kaup félagsins á eignum frá stærsta eigandanum á hluthafafundi í dag, samkvæmt frétt á kjarninn.is
Hvorki Lífeyrissjóður starfsmanna ríkisins (LSR) né Lífeyrissjóður verzlunarmanna, sem eru báðir á meðal stærstu eigenda HB Granda, hafa tekið ákvörðun um hvort að þeir muni greiða atkvæði með því að félagið kaupi allt hlutafé í sölufélögum í Japan, Hong Kong og á meginlandi Kína, sem og þjónustufélagi á Íslandi, af Útgerðarfélagi Reykjavíkur á 4,4 milljarða króna. Útgerðarfélag Reykjavíkur er stærsti hluthafi HB Granda og forstjóri HB Granda, Guðmundur Kristjánsson, er stærsti hluthafi Útgerðarfélags Reykjavíkur.
Gildi lífeyrissjóður, sem er einnig stór hluthafi í HB Granda, tilkynnti í gær að sjóðurinn muni greiða atkvæði gegn kaupunum á hluthafafundi sem fram fer á fimmtudag. Í tilkynningu vegna þess kom meðal annars fram að viðskipti við tengda aðila yrðu að vera hafin yfir allan vafa. Þær fyrirætlanir sem fyrir liggi séu ekki trúverðugar og sjóðurinn telji að ekki hafi verið sýnt fram á að aðrar leiðir séu ekki færar til þess að ná fram sömu markmiðum, mögulega með minni tilkostnaði.
Davíð Rúdólfsson, forstöðumaður eignastýringar og staðgengill forstjóra Gildis lífeyrissjóðs, sagði í samtali við Kjarnann á þriðjudag að „umfangsmikil og ítrekuð viðskipti stærsta hluthafa HB Granda við félagið eru óheppileg að okkar mati. Slíkt er fordæmalaust á innlendum hlutabréfamarkaði.“