-->

Versnandi staða sjávarútvegsins

Staða sjávarútvegsins fer versnandi samkvæmt fyrirliggjandi upplýsingum um áætlaðar tekjuskattsgreiðslur fyrirtækja í greininni á þessu ári og vísbendingum um verga framlegð þeirra á árinu. Þetta kemur fram í Morgunblaðinu í dag.
Birkir Leósson hjá endurskoðunarfyrirtækinu Deloitte segir í samtali við Morgunblaðið að áætlað sé að sjávarútvegsfyrirtækin muni greiða 7,8 til 8,2 milljarða í tekjuskatt á þessu ári. Það er veruleg lækkun frá greiðslum vegna rekstrarársins 2012 þegar upphæðin var um 8,7 til 8,8 milljarðar króna.
Í fréttaskýringu um stöðu sjávarútvegsins í Morgunblaðinu í dag segir Kolbeinn Árnason, framkvæmdastjóri LÍÚ, að upplýsingar sem hann hafi fengið úr óbirtum uppgjörum sjávarútvegsfyrirtækja bendi til talsverðrar lækkunar á vergri framlegð þeirra. Um sé að ræða lækkun á bilinu 20% til allt að 50%.