Ýsa á austrænan hátt

Mildir austurlenski karrýréttir eru mikið lostæti og mögulegar útfærslur nær endalausar. En við hér á Fróni höfum að sjálfsögðu fisk í slíkum réttum. Við mælum með ýsu, en auðvitað má nota nánast hvaða hvítan fisk sem er. Þetta er hollur, einfaldur og bragðgóður réttur, sem getur hentað hvort sem er í fjölskylduveislu eða rómantískan kvöldverð.

Innihald:

• 2 rif marinn hvítlaukur
• 1 bolli kókoshnetumjólk
• ¼ bolli matarolía
• safi úr einni límónu
• 1 ½  msk karrýduft
• ¼ tsk rauðar piparflögur
• 1 gul paprika í sneiðum
• 1 bolli rifnar gulrætur
• 4 vorlaukar, saxaðir
• 800g ýsa í 4 jöfnum bitum
• ¼ bolli basilíka, söxuð
• Salt
• hrísgrjón

Aðferðin:

1. Notið góða djúpa pönnu með loki.
2. Setjið hvítlaukinn, kókosmjólkina, olíuna, límónusafann, karrýduftið og rauðu piparflögurnar út á pönnuna og saltið eftir smekk. Hrærið þetta vel saman. Bætið síðan paprikunni, gulrótunum og vorlauknum út í og hrærið vel saman. Setjið pönnuna á lágan hita og látið krauma í 15 mínútur undir loki.
3. Sjóðið grjónin.
4. Takið lokið af pönnunni og raðið fiskbitunum ofan í sósuna þannig að þeir skarist ekki. Setjið lokið á á ný og látið krauma í 10 til 15 mínútur eftir þykkt fiskbitanna
5. Gerið beð úr hrísgrjónunum á fjórum diskum, setjið einn bita af fiski ofan á grjónin á hverjum diski, jafnið sósunni yfir fiskbitana og stráið saxaðri basilíku yfir og berið fram. Með þessu má einnig hafa gott salat og nýbakað brauð.