-->

Ýsa í karrý og kókosmjólk

Nú fáum við okkur ýsu með austurlensku ívafi. Þetta er uppskrift sem líklega er ættuð frá Indlandi, nema auðvitað ýsan. Þeir nota aðrar fisktegundir en við. Þetta er tiltölulega auðveldur réttur í matreiðslu þó innihaldið sé fjölbreytt. Uppskriftin er ætluð fyrir fjóra.

Innihald:

600g fersk ýsa, roð- og beinlaus skorin í hæfilega munnbita.

Safi úr einni límónu

1 tsk. túrmerik

3 msk. matarolía

1 stór laukur smátt saxaður

1 msk. rifinn engifer

4 geirar af hvítlauk, skornir í þunnar sneiðar

2 tsk. malað cumin

2 tsk. malaður kóríander

1 tsk. karrýmauk

½-1 tsk.  chilli flögur

2 msk. tómatpúrra

300g soðnar gulrætur og sætar kartöflur í sneiðum og teningum

200ml kókoshnetumjólk

200ml. vatn

1 grein af ferskum kóríander, söxuð

salt

nýmalaður svartur pipar

hrísgrjón

Aðferð:

Setjið ýsubitana í skál og kryddið með salti og pipar. Bætið helmingnum af límónusafanum og helmingnum af túrmerikinu út í og blandið öllu vel saman. Leggið til hliðar.

Hitið olíu á pönnu á meðal hita og mýkið laukinn í olíunni. Bætið þá engifer, hvítlauk, ½ tsk. salti, því sem eftir er af túrmeriki og öðru kryddi út á og látið malla í 2 mínútur. Bætið þá tómatpúrrunni út í og hrærið vel saman. Bætið þá gulrótum og sætum kartöflum á pönnuna og hrærið vel saman.

Bætið loks kókosmjólkinni, vatninu og karrýmaukinu út á pönnuna og látið malla í 8-10 mínútur eða þar til sósan er byrjuð að þykkna.

Færið nú ýsubitana út á pönnuna og látið malla í nokkrar mínútur, eða þar til fiskurinn er eldaður í gegn. Takið pönnuna af hellunni og hrærið því sem eftir er af límónusafanum út í .

Berið fram með soðnum hrísgrjónum og brauði að eigin vali.

 

Tengdar færslur

thumbnail
hover

Stuðla að grænum skrefum í sjávarútvegi

Frumvarp til laga um breytingu á lögum um veiðar í fiskveiðilandhelgi Íslands og breytingar á lögum um stjórn fiskveiða (aflvísir...

thumbnail
hover

Íþyngjandi gjaldtaka hægir á verðmætasköpun í...

„Gjaldtaka í sjókvíaeldi er umfangsmeiri en í flestum öðrum atvinnugreinum hér á landi. Flest fyrirtæki greiða hefðbundin gjöl...

thumbnail
hover

Mikið óveitt af ufsa

Mikið er óveitt af ufsa nú þegar fiskveiðiárinu er að ljúka. Það er svipuð staða og í fyrra. Kvótinn nú er 78.700 tonn, aflin...