Þrálát ótíð torveldar veiðar

209
Deila:

Ísfisktogarinn Viðey RE kom til hafnar í Reykjavík í gærmorgun með um 120 tonna afla. Skipið var að veiðum úti fyrir NV-landi og á Vestfjarðamiðum en þrálát ótíð hefur torveldað veiðar á þessum slóðum í lengri tíma.

,,Við byrjuðum úti fyrir NV-landi. Það var þorskur á Strandagrunni en vitlaust veður. Þegar aflinn minnkaði fórum við vestur eftir og hættum ekki veiðum fyrr en austan við Víkurálinn. Við fengum svo til eingöngu þorsk en það er mjög erfitt að meta ástandið þegar það er óveður dag eftir dag. Það væri of mikið sagt að það hafi dúrað á milli veðra. Nær væri að segja að vindurinn hafi linast aðeins á milli þess að það versta reið yfir,” segir Jóhannes Ellert Eiríksson (Elli), skipstjóri á Viðey í samtali á heimasíðu Brims.

Að sögn Ella var ógjörningur að stunda tveggja trolla veiðar vegna veðurs.

,,Við áttum fullt í fangi með eitt troll og það hefði ekki verið hægt að stunda veiðarnar nema vegna þess hve skipið er öflugt. Við vorum lengst af einir á slóðinni en önnur skip voru mun grynnra og nær landi.”

Viðey stoppaði ekki lengi í Reykjavík því farið var aftur út í gærkvöldi. Skipið á svo að koma til hafnar á Þorláksmessu.

 

 

Deila: