Liðkað fyrir makrílveiðum Færeyinga við Noreg

Jacob Vestergaard, sjávarútvegsráðherra Færeyja hefur breytt reglugerð um veiðar færeyskra uppsjávarveiðiskipa innan lögsögu Noregs þannig að takmarkanir á veiðunum falla úr gildi.

Samkvæmt breytingunni geta útgerðir skipanna nú veitt makríl innan lögsögu Noregs án takmarkana uns hámarki sem er í gildi er náð, en það er 83.524 tonn. Með þessu móti aukast líkur á því að færeyskar útgerðir geti nýtt heimildir sína til makrílveiða innan norsku lögsögunnar.

Miðað við aflabrögð hingað til  er hins vegar ólíklegt að Færeyingar geti fullnýtt sér heimildir sínar í norsku lögsögunni.