Mikil aukning í þorskafla á strandveiðum

186
Deila:

Liðlega 40% aukning varð í þorskveiðum strandveiðiflotans frá 2016 til 2021. Fyrra árið veiddust 7900 tonn af þorski en 11.171 tonn í ár. Bátum fjölgaði úr 594 í 672 á sama tímabili. Þetta kom fram í ræðu Arnar Pálssonar, framkvæmdastjóra Landssambands smábátaeigenda á aðalfundi samtakanna sem haldinn var fyrir helgi.

Þorskaflinn hefur aldrei verið meiri frá upphafi strandveiða 2009. Hefur aflinn nærfellt þrefaldast á tímabilinu.

Aflahæstur strandveiðibátanna í sumar varð Agla ÁR með 51 tonn. Eigandi og útgerðarmaður er Hnífsdælingurinn Aðalbjörn Jóakimsson.

Mest landað á Patreksfirði

Mestur afli barst á land á Patreksfirði í strandveiðunum í sumar eða um 1200 tonn. Næst aflahæst var Bolungavík þar sem landað var um 1050 tonnum. Norðurfjörður í Árneshreppi var fimmta hæsta höfnin með 600 tonn og Suðureyri í sjötta sæti með svipað. Á Tálknafirði var landað nærri 400 tonnum og var staðurinn í 11. sæti yfir hafnir landsins.

Fjöldi landana var einnig mestur á Patreksfirði en þar voru rúmlega 1700 landanir og næst kom Bolungavík eða um 1500 landanir. Suðureyri varð í þriðja sæti með um 900 landanir.

Deila: