Ekkert ár eins

Maður vikunnar að þessu sinni var á leið á Hampiðjutorgið að veiða grálúðu, þegar Auðlindin ræddi við hann. Það er eiginlega eini fiskurinn sem gengur vel að selja um þessar mundir, en lúðan fer til Asíu. Hann er frá Neskaupstað og byrjaði til sjós með Sveini Benediktssyni.

Nafn:

Bjarni Ólafur Hjálmarsson.

Hvaðan ertu:

Neskaupstað.

Fjölskylduhagir?

Giftur Stefaníu Freysteinsdóttur, á 4 börn og 2 barnabörn.

Hvar starfar þú núna?

Hjá Síldarvinnslunni í Neskaupstað sem skipstjóri á Blæng NK-125.

Hvenær hófst þú vinnu við sjávarútveg?

1987 eða 1988.

Hvað er það skemmtilegasta við að vinna við íslenskan sjávarútveg?

Mikil fjölbreytni. Ekkert ár er eins.

En það erfiðasta?

Ætli það séu ekki mannskapsmál og allt í kring um þau.

Hvað er það skrýtnasta sem þú hefur lent í í störfum þínum?

Sennilega þegar við fórum í Barentshafið í fyrra og fengum rússneskan eftirlitsmann um borð hjá okkur sem átti að vera með okkur í 35. daga, en hann kunni bara rússnesku. Enga ensku. Ég var svo heppinn að stýrimaðurinn hjá mér kunni rússnesku svo að þetta bjargaðist.

Hver eftirminnilegasti vinnufélagi þinn?

Ég mundi segja Sveinn Benediktsson (fyrrverandi skipstjóri).  Ég byrjaði til sjós með honum og það var einstaklega gott að vera með honum. Lærði margt af honum.

Hver eru áhugamál þín?

Útivist, golf, og að ferðast.

Hver er uppáhaldsmaturinn þinn?

Mundi segja rjúpur.

Hvert færir þú í draumfríið?

Eitthvert til Asíu.