Enn er síld unnin í Neskaupstað

Enn er íslensk sumargotssíld unnin í fiskiðjuveri Síldarvinnslunnar í Neskaupstað. Í gær var verið að landa úr Barða NK sem kom daginn áður með rúmlega 900 tonn af miðunum vestur af landinu. Börkur NK var á landleið, einnig með rúmlega 900 tonn, og kom til hafnar í morgun. Vilhelm Þorsteinsson EA var í gær að koma á síldarmiðin eftir að hafa landað 1.300 tonnum eystra.

Heimasíðan sló á þráðinn til Hjörvars Hjálmarssonar, skipstjóra á Berki í gær, en þá var skipið nýlega komið framhjá Vestmannaeyjum á austurleið. „Það var heldur erfitt að eiga við síldina núna. Það var ekki mikið af lóðningum og síldin var á litlum blettum. Þar að auki var ótíð, sannkallað skítaveður flesta daga. Hvað við gerum í framhaldinu er óvíst. Við erum klárir í að halda áfram á síldinni eða fara norður fyrir land og hyggja að loðnunni,“ segir Hjörvar.
Ljósmynd Smári Geirsson.