Hörpudiskur í parmesan ostasósu
Hörpudiskur er einstakt góðmeti og sannarlega veisluréttur og hentar vel í rómantískan kvöldverð fyrir ástfangið fólk á öllum aldri. Þetta er fremur dýrt hráefni en hörpudiskinn má fá frosinn í góðum fiskbúðum og frystiborðum. Við mælum með þeim íslenska ef hann er fáanlegur en annars er innfluttur hörpudiskur mjög góður og best að hafa hann stóran.
Innihald:
1 msk. ólífuolía
600g hörpudiskur
salt og pipar
1 bolli rjómi
¼ bolli kjúklingasoð
safi úr hálfri sítrónu
½ bolli parmesan ostur, rifinn
1 tsk. sósujafnari
1 msk. vatn
Aðferð:
Þurrkið hörpudiskbitana vandlega með eldhúsbréfi. Setji ólífuolíuna á góða pönnu og hitið þar til hún fer að rjúka. Steikið hörpudiskinn í um 3 mínútur á hvorri hlið uns þeir verða fallega gullnir. Takið þá síðan af pönnunni og leggið til hliðar.
Lækkið hitann á pönnunni niður á miðlung og hellið rjómanum út á hana ásamt kjúklingasoðinu, sítrónusafanum og ostinum. Hrærið sósujafnarann út í vatn í lítilli skál og hrærið honum síðan út sósuna. Látið hana malla þar til hún fer að þykkna. Setjið þá hörpudiskbitana út í sósuna og látið malla í rúma mínútu til að fá hita í bitana.
Berið réttinn fram í pönnunni og skreytið með ferskri steinselju eða öðru fersku grænmeti. Ristað brauð, soðin hrísgrjón og ferskt salat að eigin vali á vel við með þessum fína rétti.