Hnúðlax fjölgar sér í íslenskum ám
Í fyrsta sinn er staðfest að hnúðlax hefur fjölgað sér í íslenskum ám. Sýnatökur í Botnsá í Hvalfirði sýna svo ekki verður um villst að hnúðlax er kominn í íslenska náttúru. Áform eru um að skoða laxveiðiár víðar á landinu til að sannreyna hvort hnúðlaxaseiði finnast þar. Frá þessu var greint í eftirfarandi frétt á ruv.is í gær.
Vísindamennirnir hafa fundið hundruð seiða í Botnsá í gær og í dag.Guðni Guðbergsson er sviðsstjóri ferskvatns og eldissviðs Hafrannsóknastofnunar
„Það er búið að staðfesta það að Hnúðlaxinn hefur hrygnt hér í Botnsá. Hrognin hafa klakist út, seiðin hafa lifað af og þau eru nú á leið til sjávar.“
Fyrst varð vart við hnúðlax á Íslandi árið 1960. Frá 2015 hafa æ fleiri laxfiskar af þessari tegund fundist hér. Talið er að fiskurinn hafi komið frá Rússlandi og Norður-Noregi. Samstarf hefur verið milli íslenskra, breskra og pólskra vísindamanna við rannsóknir á hnúðlaxi hér á landi og víðar.
Verið er að skoða að taka sýni úr fleiri ám til að kanna hvort hnúðlaxaseiði finnast þar.
„En við veiddum hér líka í gær af því að menn vilja vita hvaða áhrif þetta mögulega hefur og við veiddum sjóbirtingsseiði sem væntanlega eru líka á niðurgöngu. Þau höfðu verið að gæða sér á þessum hnúðlaxaseiðum. Þannig að það eru alla vega einhverjir hér sem að njóta góðs af.“
Þáttur í rannsókninni er að kanna hvað hnúðlaxinn étur og hverjir éta hann. Ekki er vitað hver áhrif þessa nýja laxastofns hér á landi verða á villta stofninn. Hnúðlax er nothæfur til manneldis ef hann er veiddur um leið og hann kemur upp í árnar en er ekki góður til átu nema í skamman tíma.
„Mögulega hefur hann áhrif alla vega á ímynd og ég veit að í Noregi hafa menn verið að gera ráðstafanir til að reyna að veiða hnúðlaxa þannig að þeir fari ekki upp í ár. Hins vegar er hnúðlax búinn að vera í rússneskum ám í ansi langan tíma og þeirra skoðun og niðurstöður eru þær að það hefur enginn laxastofn beðið hnekki af komu hnúðlaxins.”
Michal Skora doktor í fiskeldi segir rannsóknina einnig snúa að því að kanna kosti og galla þess þegar ný fisktegund kemur inn í lífríki landa í Norður-Atlantshafi.
Michal Skora doktor í fiskeldi segir ánægjulegt sem vísindamaður að finna seiðin en sem manneskja sem vill vinna að verndun náttúrunnar veki það ekki gleði þegar ný tegund sem gæti skaðað náttúrulega fiskistofna birtist.