Hampiðjan gengur frá kaupunum á Kohinoor

Hampiðjan hefur gengið frá uppgjöri vegna kaupa á 75,1% hlut í indverska fyrirtækinu Kohinoor eftir að öll skilyrði og áreiðanleikakannanir á sviði reksturs, lagaumhverfis, skatta og umhverfis- og samfélagsmála voru uppfyllt. Greiðslan fyrir hlutinn nam 21,7 milljónum evra og hefur verið móttekin af seljanda. Endanlegt kaupverð gæti hækkað í allt að 25,8 milljónir evra ef afkomuskilyrðum næstu ára er náð, en óljóst er enn hvort þau markmið hafi náðst á nýloknu rekstrarári sem lauk 31. mars.

Í kaupsamningi eru tvö afkomuskilyrði sem geta skilað seljendum viðbótargreiðslum, annars vegar ef EBITDA næst 4,45 milljónir evra á rekstrarárinu 2024–25 og hins vegar 5,52 milljónir evra árið eftir. Ef samanlögð EBITDA beggja ára fer yfir þessi viðmið getur kaupverðið hækkað að hámarki um 4,14 milljónir evra.

Kohinoor er einn stærsti framleiðandi neta og kaðla á Indlandi með ársframleiðslu upp á um 14.300 tonn. Félagið rekur tvær verksmiðjur í Selu og netaverkstæði í Jalna, auk skrifstofu í Aurangabad. Alls starfa um 700 manns hjá félaginu. Með kaupunum stækkar starfsmannafjöldi samstæðu Hampiðjunnar í um 2.700 manns.

Unnið er að uppbyggingu nýrrar verksmiðju á 12 hektara landsvæði í iðnaðarhverfinu Auric, skammt frá Aurangabad. Þar verður hægt að byggja allt að 70.000 m² húsnæði með fullkomnum innviðum og góðum tengingum við hraðbraut til Mumbai. Byggingaframkvæmdir eru fyrirhugaðar í vor og stefnt er að því að ljúka fyrsta áfanga um áramótin.

Samhliða uppbyggingu á Indlandi stendur yfir flutningur á framleiðslubúnaði frá Litháen, Noregi og Póllandi. Fyrsta kaðlavélin er þegar í flutningi og áætlað er að flutningur á vefstólum og sérhæfðum saumavélum hefjist síðar í sumar. Þetta er liður í yfirfærslu á framleiðslu fiskeldiskvía til Indlands, sem stuðlar að aukinni hagræðingu í ljósi hagstæðari rekstrarskilyrða þar í landi.

Í tengslum við þessa endurskipulagningu hefur einnig verið dregið úr starfsemi víða í Evrópu. Í Noregi hefur framleiðsla á ofurtógi verið flutt frá Hildre til Litháen og í Danmörku hefur starfsfólki Mørenot verið fækkað og starfsemin flutt til Noregs. Þar verður áfram sinnt alþjóðlegri sölu.

Kaupin á Kohinoor og tilheyrandi uppbygging á Indlandi marka tímamót í þróun Hampiðjunnar sem alþjóðlegs leiðtoga í framleiðslu neta og búnaðar fyrir sjávarútveg og fiskeldi.