Mikil afföll vegna laxalúsar

Arnarlax, stærsta laxeldisfyrirtæki Íslands og dótturfélag Icelandic Salmon, hefur upplifað verulegar áskoranir á fyrsta ársfjórðungi 2025 vegna líffræðilegra vandamála í sjókvíaeldi. Félagið tapaði 430 milljónum vegna laxalúsar á fyrstu þremur mánuðum þessa árs. Frá þessu segir í tilkynningu félagsins til norsku kauphallarinnar en RÚV fjallar um málið í dag.

Á fyrsta ársfjórðungi 2025 slátraði Icelandic Salmon 1.100 tonnum af laxi, samanborið við 2.800 tonn á sama tímabili árið áður. Þessi samdráttur er að hluta til vegna snemmslátrunar sem var nauðsynleg til að vernda velferð fiska í kjölfar líffræðilegra áskorana, þar á meðal laxalúsar og annarra erfiðleika í sjókvíaeldi. Félagið greindi frá því að kostnaður vegna dánartíðni hafi numið 1,6 milljónum evra.

Í ársfjórðungsuppgjörinu segir að verið sé að vinna í því að finna tæknilausnir til að minnka þessi afföll, eða koma í veg fyrir þau.