Einhamar gefur UMFG rútu

116
Deila:

Ungmennafélag Grindavíkur fékk sannarlega frábæra gjöf þegar forsvarsfólk sjávarútvegsfyrirtækisins Einhamars Seafood færði félaginu að gjöf 22 manna Mercedes rútu sem hefur verið merkt UMFG.

„Um er að ræða frábæra gjöf sem mun nýtast öllu félaginu vel í keppnisferðir á vegum félagsins. Rútan hefur verið í eigu Einhamars í nokkur ár og stóð til að skipta henni út og selja. Þess í stað ákváðu stjórnendur Einhamars að taka rútuna í gegn, lagfæra og færa Ungmennafélaginu hana að gjöf. Þessi Mercedes Sprinter rúta kemur því nánast sem ný til félagsins,“ segir í færslu á fésbókarsíðu Ungmennafélagsins.

Rútan var formlega afhent í gær og voru þau Rakel Lind Hrafnsdóttir, frá körfuknattleiksdeild og Gunnar Már Gunnarsson, frá knattspyrnudeild, sem tóku við rútunni frá Söndru Antonsdóttur, einum eigenda Einhamars.

„Við þökkum ótrúlegan hlýhug frá Einhamar Seafood í garð félagsins. Það hefur lengi verið draumur félagsins að eignast svona rútu til að geta farið sem ein heild í keppnisferðir út á land, hvort sem það eru meistaraflokkar félagsins eða fyrir yngri flokka. Rútan mun standa öllum deildum félagsins til boða og ætti að lækka ferðakostnað félagsins verulega þegar fram líða stundir,“ segir Bjarni Már Svavarsson, formaður UMFG við þetta tilefni

„Aðalstjórn Ungmennafélags Grindavíkur, vill koma á framfæri kærum þökkum til Einhamars Seafood fyrir þessa ótrúlegu gjöf sem við vonum svo sannarlega að muni nýtast mörgum ungum Grindvíkingum um ókomin ár. Svona gjöf gefur félagið byr undir báða vængi til að gera gott starf enn betra.“

 

Deila: