Kaupendur grásleppuhrogna varfærir

Grásleppuveiðar máttu hefjast í gær, en áhugi á veiðunum er takmarkaður, vegna lítillar eftirspurnar eftir afurðunum. Kínverjar sýna kaupum á grásleppubúkum mjög lítinn áhuga og hefur fengist undanþá frá því að koma með grásleppuna heila í land.

Fjallað er um stöðuna á heimasíðu Landssambands smábátaeigenda: „Kaupendur grásleppuhrogna eru afar varfærnir í upphafi vertíðar hvað varðar magn og verð sem þeir munu bjóða.  Upplýsingar benda til að vel hafi gengið að selja kavíarinn á sl. ári miðað við aðstæður og verð nokkuð stöðugt.  Á síðasta ári varð smávægileg lækkun milli ára, en verð kavíars þó hærra en á árinu 2019.  

Heildarafli á síðustu vertíð jókst um 40% frá árinu 2020, þó það ár hafi fyllt tíu ára meðaltal veiða.  Umreiknuð heildarveiði á grásleppu til hrogna nam 14.200 tunnum sem var 56% heimsveiðinnar.  Á Grænlandi var veiðin stöðvuð við 8.600 tunnur þar sem ekki lá fyrir sala á meira magni.  Alls voru þjóðirnar tvær því með 90% heimsaflans. 

Þó kavíarinn hafi haldið verðgildi sínu er ekki sömu sögu að segja um útflutningsverðmæti á hrognunum.  Eins og sést á grafinu sem hér fylgir var verð á síðasta ári það lægsta sem sést hefur í áratug.  Það endurspeglar verð til sjómanna sem segja að á vertíðinni sem í hönd fer verði að koma til verðhækkun til að tryggja veiðar.“