Vegagerðin Landeyjahöfn til varnar

„Þegar horft er til staðsetningar hafnarinnar er mikilvægt að halda því til haga að staðsetningin var valin að loknum ítarlegum rannsóknum, sem meðal annars ná til skoðunar á öldufari, dýptarmælingum og sandburði.” Þetta segir í ítarlegri frétt á vef Vegagerðarinnar, sem ber fyrirsögnina Landeyjahöfn á réttum stað.

Í fréttinni svarar Vegagerðin fyrir þá gagnrýni sem borist hefur að höfninni að undanförnu.

„Þegar ófært er í Landeyjahöfn og einnig þegar unnið er að dýpkun heyrist umræða á þeim nótum að höfnin sé ekki rétt hönnuð og byggð eða hún sé ekki rétt staðsett. Slíkar vangaveltur eru skiljanlegar þegar veturinn hefur verið erfiður og margir orðnir langþreyttir á ófærð eða slæmskuveðri sem valda því að siglingar falla niður,” segir í fréttinni.

Því næst er farið yfir að staðsetning hafnarinnar hafi byggt á ítarlegum rannsóknum. Einnig er bent á að nýtingarhlutfall hafi aukist með nýjum Herjólfi.

Margt hefur áunnist á þeim tíma sem unnið hefur verið  með Landeyjahöfn. „Frá því hún opnaði og þar til núna hefur nýtingarhlutfallið aukist verulega með nýjum Herjólfi og aukinni reynslu í rekstri hafnarinnar. Vonir standa til að hægt verði að halda áfram að bæta höfnina, enda öllum ljóst hversu mikilvæg þessi samgöngubót er fyrir Vestmanneyinga og gesti þeirra.”

Fréttina má í heild lesa hér.