Ráðherra leyfir veiðar á 128 langreyðum
![](https://audlindin.is/wp-content/uploads/2024/05/IMG_7424-750x375.jpg)
Bjarkey Olsen Gunnarsdóttir matvælaráðherra hefur veitt Hval hf. veiðileyfi til veiða á 128 langreyðum. Þetta kemur fram í tilkynningu frá Matvælaráðuneytinu.
Bjarkey tók við embættinu nýverið og sagðist vilja kynna málið vel áður en hún tæki ákvörðun. Hún tilkynnti ákvörðun sína á ríkisstjórnarfundi í morgun.
Leyfið gildir fyrir veiðitímabilið 2024. Veiða má 99 dýr á svæðinu Grænland/Vestur-Ísland og 29 dýr á svæðinu Austur-Ísland/Færeyjar. Samtals 128 dýr.
Bjarkey hefur í dag lýst því yfir að hún hafi ekki getað tekið aðra ákvörðun því hún sé bundin af lögum.