Hólmasker fær nýja handflökunarlínu

Á dögunum var gengið frá samningi milli Slippsins Akureyri og fiskvinnslunnar Hólmaskers í Hafnarfirði um smíði og uppsetningu á nýrri handflökunarlínu sem er sú fyrsta sinnar tegundar í framleiðslu DNG fiskvinnslubúnaðar hjá Slippnum Akureyri. Línan er hönnuð og smíðuð af starfsmönnum Slippsins í Grindavík og er áformað að hún verði sett upp í vinnslustoppi hjá Hólmaskeri í kringum jólin. Frá þessu er greint á vef SlippsinsDNG.

Í fréttinni segir að Fiskvinnslan Hólmasker sérhæfi sig í vinnslu á ýsu, sem að stærstum hluta fari sem frystar afurðir á Bandaríkjamarkað. Hlutur ferkra ýsuafurða hafi þó smám saman farið vaxandi. Fyrirtækið vinnur afurðir úr um 4.000 tonnum af ýsu árlega. Hráefnið kemur að sögn aðallega frá Vinnslustöðinni í Vestmannaeyjum, sem á meirihluta í fyrirtækinu. Albert Erluson framkvæmdastjóri á fjórðungshlut í Hólmaskeri.

Fram kemur í fréttinni að 90% hráefnisins hjá Hólmaskeri sé handflakað. Nýja línan verði með 10 vinnustöðvum í stað þeirra átta sem eru í núverandi línu. „Handflökunarlínan okkar í dag er orðin gömul og slitin og kominn tími á endurnýjun hennar. Ég sá líka tækifæri til að fjölga flökunarstöðvum með nýrri línu, bæði til að auka afköst og líka til að mæta þeirri þróun sem hefur verið að undanförnu í ýsunni að fiskurinn er aðeins smærri en á síðustu árum,“ er haft eftir Alberti í fréttinni. Fyrr á þessu ári tók Hólmasker í notkun nýjan Promas framleiðsluhugbúnað frá Slippnum sem mun nýtast að fullu í að halda utan um framleiðslu, gæði og afköst í vinnslunni á nýju handflökunarlínunni.

„Nýja handflökunarlínan er í reynd þriðja verkefnið sem Slippurinn vinnur fyrir okkur hér í Hólmaskeri og í ljósi góðrar reynslu af þeirra hönnun og framleiðslu lá beint við að semja við fyrirtækið um nýju línuna,“ segir Albert.

Nánar má lesa um samstarf Hólmaskers og Slippsins Akureyri hér.