Segja afköstin verri með smábátafisk
Samherji lýsir á vef sínum yfir áhyggjum af áhrifum aukins hlutfalls fisks frá smábátum á afköst og laun í landvinnslu félagsins. Í frétt á vef fyrirtækisins kemur fram að þegar unnið sé með fisk frá smábátum dragist afköst í fiskvinnsluhúsum félagsins á Dalvík og Akureyri verulega saman, sem leiði til lægri bónusa fyrir starfsfólk. Þetta er rakið til lakari gæða hráefnisins frá smábátum og aukins tíma sem fer í vinnslu slíks fisks.
Hrefna Þorbergsdóttir, starfsmaður hjá Útgerðarfélagi Akureyringa með 48 ára reynslu, segir í fréttinni að fiskur frá smábátum sé oft illa ísaður og þurfi mikla handavinnu við vinnslu, sem bitni á geymsluþoli og gæðum afurða. Hún bendir á að þetta hafi áhrif á laun starfsfólks, þar sem bónusar lækki þegar afköst dragist saman. Sunneva Ósk Guðmundsdóttir, framleiðslustjóri ÚA, tekur undir þetta og segir að afköst lækki úr ellefu tonnum á klukkustund í sex tonn þegar unnið er með smábátafisk.
Samherji leggur áherslu á að tryggja stöðugleika í afhendingu afurða og segir að engin afurð sé pakkað sem ekki stenst ítrustu gæðakröfur. Þrátt fyrir áskoranirnar er félagið háð því að kaupa hráefni á mörkuðum til að viðhalda vinnslu allan ársins hring, en hlutfall fisks frá smábátum hefur aukist verulega á mörkuðum frá því strandveiðitímabilið hófst í vor.
