Vilja banna botnvörpuveiðar á stórum svæðum

Breska ríkisstjórnin kynnti nú í júní áform sín um að banna botnvörpuveiðar á 41 friðlýstu hafsvæði (Marine Protected Areas – MPAs) í enskum sjó, sem þýðir bann við slíkum veiðum á um 30.000 km² svæði til viðbótar við það sem áður hafði verið friðað. Með þessu aukna banni yrðu samtals um 48.000 km² hafsvæði friðuð fyrir botnvörpu, eða rúmlega helmingur allra friðlýstra hafsvæða Englands.

Tillagan var kynnt af Steve Reed, umhverfisráðherra Bretlands, þann 9. júní 2025, samhliða hafráðstefnu Sameinuðu þjóðanna í Nice í Frakklandi. Málið er nú í opnu samráðsferli sem lýkur 1. september næstkomandi, þar sem hagsmunaaðilar geta komið sjónarmiðum sínum á framfæri.

Botnvörpuveiðar hafa lengi verið gagnrýndar fyrir að valda skaða á viðkvæmu lífríki hafsins, eyðileggja hafsbotninn og leiða til mikils magns af meðafla, þar á meðal sjaldgæfra tegunda. Náttúruverndarsamtök hafa fagnað þessari ákvörðun og segja hana tímabæra og mikilvægt skref í átt að sjálfbærari nýtingu auðlinda hafsins.

Á móti hefur heyrst gagnrýni frá samtökum fiskimanna sem lýsa yfir áhyggjum af atvinnulegum áhrifum bannsins og vilja tryggja jafnvægi milli náttúruverndar og atvinnuhagsmuna. Endanleg ákvörðun verður tekin eftir að samráðsferlinu lýkur, líklega á haustmánuðum þessa árs.