Gæslan fylgist með togveiðum á grunnslóð

„Landhelgisgæslan hefur, við eftirlit á svæðinu, mælt skip við veiðar á svæðinu með ratsjá til að ganga um úr skugga um að þau séu 3 sjómílur fyrir utan fjörumark. Síðasta slíka flug hjá Landhelgisgæslunni var farið í gær þar sem fylgst var með og mæld fjarlægð skipa við veiðar frá landi á þessu svæði.”

Þetta kemur fram í svari Landhelgisgæslunnar við fyrirspurn Auðlindarinnar um togveiðar á grunnslóð, skammt frá Hjörleifshöfða fyrir helgina. Myndir af gps-ferlum hafa borist Auðlindinni sem virðast sýna togskip að veiðum innan þriggja sjómílna frá ströndu. Myndirnar hafa verið ræddar í Facebook-hópi smábátasjómanna.

Landhelgisgæslan segir í svari sínu að stofnunin geti ekki tjáð sig um eftirlit sem tengist eintökum skipum og bátum innan íslensku efnahagslögsögunnar. Þó sé hægt að svara spurningunni með almennum hætti.

„Landhelgisgæslan heldur uppi öflugu eftirliti innan fiskveiðilögsögunnar og fylgist vel með veiðum. Reglulega er farið í eftirlitsflug á þessu svæði sem fyrirspurnin snýr að og þá er sérstaklega fylgst með þeim veiðum sem um ræðir. Mælt er fyrir um veiðar á þessu svæði í D-lið 8. mgr. 5. gr. laga um veiðar í fiskveiðilandhelgi íslands nr. 79/1997. Þar segir jafnframt að í flokki 3, sem eru skip minni en 29 metrar, megi veiða þar allt árið frá fjörumumarki á svæðinu frá Lundadrangi að línu réttvísandi suðvestur frá Reykjanesaukavita. Eins og tekið er fram í lögunum miðast fjarlægð við fjörumark sem oft veldur misskilningi varðandi fjarlægð frá landi. Fjörumarkið á þessu svæði er breytilegt.”

Fram kemur enn fremur að eftirlitið sé „almennt framkvæmt með fjareftirliti þar sem stjórnstöð Landhelgisgæslunnar fylgist með skipum í kerfum sínum og svo með rauneftirliti þar sem annað hvort flugför eða skip Landhelgisgæslunnar annast eftirlit með umferð og veiðum á hafsvæðinu umhverfis landið.”