Fylltu skipið í fimm lögnum
Vísisskipin hafa gert það gott að undanförnu. Á vef Síldarvinnslunnar er greint frá því að línuskipin Páll Jónsson GK og Sighvatur GK hafi verið að veiðum suður af landinu en togarinn Jóhanna Gísladóttir GK hafi verið að veiðum á Látragrunni. Rætt er við skipstjóra þessara skipa í fréttinni.
Benedikt Jónsso ng Páli Jónssyni segir að vel hafi gengið í síðasta túr. „Við fylltum skipið í fimm lögnum. Við byrjuðum á Sneiðinni djúpt út af Surti og þar fékkst góður afli, mest langa og keila. Þarna lögðum við tvisvar. Síðan var lagt á Holtshrauni og út af Kastrup og þar fengust 25 tonn af góðri blöndu. Þá var haldið austur á Vík og ein lögn tekin þar. Síðast var lagt við Kötlugrunnshólfið og það var alger sprengilögn. Það fengust 47 tonn í lögninni og það var einnig blandaður afli. Segja má að þessi veiðiferð hafi gengið vel í alla staði en fiskurinn sem fékkst var stór og það reyndi mikið á áhöfnina. Hér um borð er frábær mannskapur sem leysir öll verkefni vel af hendi. Veiðiferð eins og þessi væri óhugsandi ef þessi mannskapur væri ekki til staðar,” er haft eftir Benedikt.
Sighvatur landaði 103 tonnum í Grindavík í gær. Aðalsteinn Rúnar Friðþjófsson er skipstjóri. „Við fengum aflann í sex lögnum og það gekk vel að fiska í góðu veðri. Veðrið að undanförnu hefur í reyndinni verið betra en það var lengst af síðasta sumar. Í upphafi veiðiferðar var lagt við Surtsey en síðan færðum við okkur út í kantana suður af Selvogsbanka og Grindavíkurdýpi. Við lögðum áherslu á að ná blönduðum afla og þegar upp var staðið voru 35 tonn af þorski í aflanum en hitt var langa, ýsa og fleiri tegundir. Sighvatur heldur á ný til veiða í kvöld,” er haft eftir honum.
Einar Ólafur Ágústsson, skipstjóri á Jóhönnu Gísladóttur lét einnig vel af sér en togarinn landaði fullfermi í Grundarfirði á laugardaginn og aftur í Hafnarfirði í gær. „Við vorum að veiðum á Látragrunni í báðum túrum. Aflinn var mest ýsa og síðan þorskur og steinbítur. Veiðiferðirnar voru stuttar og það var fínasta veður þannig að það er engin ástæða til að kvarta,” sagði Einar Ólafur.
