Skemmtilegast þegar fiskast vel

Maður vikunnar í dag er á netabátnum Maron GK. Hann er innfæddur Grindvíkingur og byrjaði snemma að vinna í fiski. Hann heldur með „stærsta og sigursælasta knattspyrnufélagi Englands Manchester United.“

Nafn:

Sigurður Þór Birgisson.

Hvaðan ertu?

Fæddur og uppalinn í Grindavík.

Fjölskylduhagir?

Vel giftur henni Kristínu Guðmundsdóttur Hammer og eigum við 3 börn Birgi 6 ára Dagbjörtu Maríu 4 ára, Hrafnkel Daða 3 ára og hundinn Jack 10 ára.

Hvar starfar þú núna?

Er á Maron GK 522

Hvenær hófst þú vinnu við sjávarútveg?

Það hefur verið 89 eða 90 hjá Óla frænda og Helgu og þar var ÞRIKKURINN verkstjóri sem enn þann dag í dag er held ég næst besti Cribbage spilari á landinu.

Hvað er það skemmtilegasta við að vinna við íslenskan sjávarútveg?

Það er skemmtilegast þegar fiskast vel og svo eru það líka forréttindi að vera umkringdur svona eðalmönnum eins og áhöfnin á Maron er.

En það erfiðasta?

Erfiðast var að vera ekki til staðar þegar Dagbjört fæddist.

Hvað er það skrýtnasta sem þú hefur lent í í störfum þínum?

Man nú ekki eftir neinu skrýtnu í fljótu bragði.

Hver eftirminnilegasti vinnufélagi þinn?

 Verð að nefna landsliðsfélagana;   Flóameistarann Birgi,  Val Ólafs, Rúrik Hreins,  Jón Magnús og Ellert Vopna.

Hver eru áhugamál þín?

Fjölskyldan, golf og fótbolti og að fara á leiki hjá stærsta og sigursælasta knattspyrnufélagi Englands MANCHESTER UNITED.

Hver er uppáhaldsmaturinn þinn?

Nautalund með bernaise  klikkar ekki.

Hvert færir þú í draumfríið?

Var að koma úr því með fjölskyldunni á Tene, færi því aftur þangað.