Fjölskrúðugur fiskmarkaður á Balí
Fiskmarkaðurinn í Jimbaran á Balí er að öllu leyti ólíkur íslenskum fiskmörkuðum. Í fyrsta lagi eru þar nær eingöngu fisktegundir sem ekki þekkjast á Íslandi, enda veiddar úr hlýjum sjó undan strönd Bali í Indlandshafi, að mestu leyti af smáum dagróðrabátum, sem sömuleiðis eru að flest öllu leyti frábrugðnir íslenskum fiskibátum. Ís eða önnur kæling kemur fremur lítið við sögu og sjór er sóttur í fjöruna og borinn á handafli inn á markaðinn til að hella yfir fiskinn til að halda honum ferskum. Hitastigið inni á markaðnum er svipað og fyrir utan eða nálægt 30 stigum og sjórinn í kringum 20 gráðurnar.
![](https://audlindin.is/wp-content/uploads/2019/03/Jimbaran-fiskmarkaðurinn-rækja-lítil.jpg)
Hlýsjávarrækja er litlaus þar til hún hefur verið elduð. Þá verður hún rauð og falleg.
Markaðurinn er til húsa í hrörlegri byggingu og ytra umhverfi er ekki snyrtilegt. Fiskurinn er ekki boðinn upp eins og tíðkast á íslenskum mörkuðum, engin rafræn sala. Allt staðgreitt í hundruðum eða milljónum indónesískra rúpía. Ein milljón rúpía svarar til ríflega 8.000 króna. Verðið er afar lágt á íslenskan mælikvarða.
![](https://audlindin.is/wp-content/uploads/2019/03/Jimbaran-bátarnir-lítil.jpg)
Dagróðrabátarnir.
Allt sem er til sölu er til sýnis inni á markaðnum og þangað kemur fólk til að kaupa sér í matinn, ýmist til að taka með sér heim eða láta matreiða fyrir sig að hætti heimamanna á litlum veitingahúsum við hlið markaðsins og er helsta eldunaráhaldið funheitt kolagrill undir berum himni. Veitingahús kaupa svo fiskmeti sitt á markaðnum. Yfirleitt er það afli dagsins sem er til sölu, en eitthvað fer yfir á annan eða aðra daga.
![](https://audlindin.is/wp-content/uploads/2019/03/Jimbaran-hlýsjávar-humar-lítil.jpg)
Hlýsjávarhumarinn er fallegur.
Inni á markaðnum er ys og þys og fisktegundirnar skipta tugum að minnsta kosti. Allt frá rækju upp í túnfisk, flestar okkur Íslendingum svo framandi að líklega eigum við ekki einu sinni nöfn yfir þær. Litadýrðin er líka einstök og stærðin allt frá fingurstærð upp í metra eða meira. Túnfiskurinn er stærstur en minnst eru einhverskonar síli, varla munnbiti að stærð.
En sjón er sögu ríkari og við látum myndirnar tala. Þær tók Hjörtur Gíslason.
![](https://audlindin.is/wp-content/uploads/2019/03/Jimbaran-fallegir-fiskar-lítil.jpg)
Fallegir fiskar.
![](https://audlindin.is/wp-content/uploads/2019/03/Jimbaran-kjaftaskur-lítil.jpg)
Við köllum þennan kjaftask.
![](https://audlindin.is/wp-content/uploads/2019/03/Jimbaran-skelfiskur-lítil.jpg)
Falleg hörpuskel.
![](https://audlindin.is/wp-content/uploads/2019/03/Jimbaran-tannfiskur-lítil.jpg)
Líklega er þetta tannfiskur.
![](https://audlindin.is/wp-content/uploads/2019/03/Jimbaran-grillið-lítil.jpg)
Og svo er komið að grillinu. Þarna geta gestir og gangandi farið með fiskmetið af markaðnum og fengið grillað og setið fyrir utan og gætt sér á því, kannski með einum bintang bjór.