Starfsmenn Hvals halda vinnunni
Engum starfsmanni Hvals hf. sem ráðinn var til fyrirtækisins fyrir hvalveiðivertíðina sem átti að standa yfir í sumar, hefur verið sagt upp störfum. Ráðherra bannaði sem kunnugt er hvalveiðar út ágústmánuð. MBL greinir frá þessu.
Þar segir að þetta eigi bæði við um starfsmenn í landi og áhafnir hvalbátanna, sem liggi nú bundnir við bryggju í Reykjavík. Þetta munu vera á annað hundrað starfsmenn. „Það hefur engum verið sagt upp vegna hvalveiðibannsins. Þeir sem voru byrjaðir eða rétt ókomnir eru allir við störf hjá okkur og við erum að gera okkur klára til að byrja veiðarnar þann 1. september,“ er haft eftir Kristjáni Loftssyni framkvæmdastjóra og eiganda Hvals.