Áhöfnin fær þakklætiskveðjur
Áhöfn Bjarna Sæmundssonar fær hlýjar kveðjur frá Hafrannsóknastofnun, en eins og kunnugt er strandaði skipið við Tálknafjörð 21. september síðastliðinn. Í kveðju, sem birt er á heimasíðu Hafró, kemur fram að áhöfnin hafi sýnt fumlaus og fagleg vinnubrögð í þeim aðstæðum sem sköpuðust.
„Margir komu að því að aðstoða fólkið okkar og bjarga skipinu af strandstað. Við erum afar þakklát öllum þeim viðbragðsaðilunum sem tóku þátt í björguninni og að engin slys urðu á fólki.”
Sérstakir þakkir, frá skipstjóra, áhöfn og rannsóknarfólki Hafrannsóknastofnunar, fá eftirtaldir aðilar:
- Aðgerðastjórn Landhelgisgæslunnar
- Skipstjóri og áhöfn björgunarskipsins Varðar
- Skipstjóri og áhöfn Fosnafjord
- Skipstjóri og áhöfn Fosnakongen
- Skipstjóri Njarðar og björgunarsveit frá Tálkna
- Hafnarstjóri Tálknafjarðar
- Rauði krossinn í Vestur-Barðastrandarsýslu
- Starfsfólk sveitafélags Tálknafjarðar
Fram kemur að svo heppilega hafi viljað til að skipið hafi komist í slipp í Reykjavík mánudaginn 25. september til viðgerða. Verkinu miði vel, vinna við viðgerðir er hafin og útvegun varahluta er lokið. „Gert er ráð fyrir að skipið verði komið aftur í rekstur í næstu viku. Þá halda verkefni ársins áfram og þau kláruð samkvæmt settri rannsóknaáætlun. Hafrannsóknastofnun var tryggð fyrir þessu tjóni.”