Gagnrýna leyfi til hvalveiða harðlega

Landvernd og Náttúruverndarsamtök Íslands gagnrýna harðlega þá ákvörðun matvælaráðherra að veita leyfi til veiða á 99 langreyðum í sumar. Þetta kemur fram í sameiginlegri yfirlýsingu samtakanna. Í hennis segir að slíkt hvaladráp þjóni engum tilgangi enda sé markaður fyrir hvalkjöt mjög takmarkaður.

Á hinn bóginn hafi ráðherra ákveðið að takmarka veiðarnar við 99 dýr sem sé 62 dýum færri en heimilt hafi verið að veiða undanfarin ár. Samtökin vilji þó benda á að starfshópur sé enn starfandi á vegum ráðuneytisins um lagaumgjörð hvalveiða sem skila muni skýrslu sem ætlað sé að skapa grunn um stefnumótun til framtíðar í lok árs.

„Þegar litið er til framtíðar er nauðsynlegt að miða afstöðu þingsins við afstöðu þjóðarinnar sem er í meirihluta andvígur hvalveiðum. Þá ber að breyta lögum um hvalveiðar þar sem um úrelt lög er að ræða og láta þau samrýmast frekar nýrri lögum svo sem lögum um dýravelferð. Ljóst er að núverandi veiðar eru í bága við gildandi lög um dýravelferð og er það óviðunandi.”

Í yfirlýsingunni segir enn fremur:

Ekki er ljóst hvað ráðherra á við með að ákvörðun taki mið af „… varfærnum vistkerfisstuðlum Alþjóðahvalveiðiráðsins.” en Hafrannsóknarstofnun hefur miðað við að stofninn minnki ekki meira en sem nemur 60% af upphaflegri stærð. Alþjóðahvalveiðráðið vill miða við að stærð langreyðarstofnsins fari ekki niður fyrir 72% af upphaflegri stærð sem gefur umtalsvert minni kvóta en 161 dýr, líkt og verið hefur sl. 12 ár.

Samtökunum þykir mikilvægt að ráðherra hunsi ekki álit Alþjóðahvalveiðiráðsins.

Ennfremur, leyfið gildir aðeins til eins árs en ekki næstu 5 – 10 líkt og Hvalur hf. fór fram á. Því ber að fagna og full ástæða til að nota tímann til þess að endurskoða lög um hvalveiðar. 

Enn gildir að útilokað er að drepa langreyðar með mannúðlegum hætti.