Ný aðgerðaáætlun um minni losun
Bjarni Benediktsson forsætisráðherra, Guðlaugur Þór Þórðarson, umhverfis-, orku- og loftslagsráðherra, Bjarkey Olsen Gunnarsdóttir matvælaráðherra og Lilja Alfreðsdóttir menningar- og viðskiptaráðherra kynntu uppfærða útgáfu aðgerðaáætlunar í loftslagsmálum í vikunni.
Aðgerðaáætlunin samanstendur af 92 loftslagsaðgerðum og 58 loftslagstengdum verkefnum. Kortlagning aðgerða er mun ítarlegri og áhrifamat þeirra varðandi losun umfangsmeira en í fyrri útgáfum.
Í uppfærðri aðgerðaáætlun er metinn beinn ávinningur 26 aðgerða á beinni ábyrgð stjórnvalda í samfélagslosun Íslands. Áætla má að áætlunin skili 35-45% samdrætti í samfélagslosun fyrir 2030.
Í aðgerðaáætlun eru nokkur atriði sem snúa að höfnum landsins. Þær má sjá hér fyrir neðan:
Hafnir
- Greindar verða hagkvæmar leiðir, forgangsröðun og framkvæmdaáætlun um uppbyggingu áfyllingarinnviða fyrir skip knúin endurnýjanlegum orkugjöfum (öðrum en rafmagni) í höfnum, t.a.m. grænu vetni, metanóli og ammóníaki. Upphaf / Endir 2026 – 2030. Staða: Á hugmyndastigi.
- Uppbygging háspennutenginga í stærri höfnum fyrir skip í vöruflutningum, ferðaþjónustu og sjávarútvegi út frá forgangsröðun og framkvæmdaáætlunum til viðbótar við fyrirliggjandi lágspennutengingar í heimahöfnum. Upphaf / Endir 2000 – 2030. Staða: Í framkvæmd.
- Greindar verða hagkvæmar leiðir að því að koma upp rafmagnshleðsluinnviðum fyrir rafknúin skip í höfnum. Unnið verður að forgangsröðun hafna og aðgerðaáætlun fyrir framkvæmdir í höfnum. Upphaf / Endir 2024 – 2030. Staða: Á hugmyndastigi.
- Hafnir skulu fá heimild til að láta gjaldskrár taka mið af umhverfissjónarmiðum með vísan til orkunýtni og kolefnisnýtni siglinga. Upphaf / Endir 2023 – 2025. Staða: Í framkvæmd.
Skip
- Innleiða fræðslu um endurnýjanlega orkugjafa, viðeigandi vélbúnað og sparneytnar siglingar í skip- og vélstjóranám. Upphaf / Endir 2024 –. Staða: Á hugmyndastigi.
- Unnið verður að eflingu hafrannsókna og forgangsröðun fjármagns til hafrannsókna sem tryggir gott ástand vistkerfa í hafi og lágmarkar þannig losun vegna nytja. Upphaf / Endir 2024 – 2028. Staða: Í framkvæmd.
- Fylgjast með ávinningi nýlegra breytinga á regluverki um viðbótaraflaheimildir rafvæddra strandveiðibáta sem stuðlað geta að hraðari orkuskiptum á strandveiðum og uppfæra eftir þörfum. Upphaf / Endir 2024 – 2030. Staða: Samþykkt.
- Fyrirtæki í sjávarútvegi skuldbinda sig til að draga úr úblæstri frá rekstri útgerðanna með ýmsum ráðum, og vinna þannig að því að draga úr losun vegna eldsneytisnotkunar fiskiskipa um 50% árið 2030 m.v. 2005. Upphaf / Endir 2024 – 2030. Staða: Fyrirhugað.
- Unnið verður að orkuskiptum í ferjum ríkisins. Fram til ársins 2030 verða hannaðar, byggðar og teknar í rekstur ný Hríseyjarferja og ný Grímseyjarferja, knúnar endurnýjanlegum orkugjöfum. Upphaf / Endir 2024 – 2030. Staða Í framkvæmd.
- Markvisst verður dregið úr notkun jarðefnaeldsneytis í skipum ríkisins og skipt út fyrir endurnýjanlega orkugjafa svo 10% hlutfall náist að lágmarki í heildarflota ríkisins. Upphaf / Endir 2024 – 2030. Staða: Í framkvæmd.
- Styðja við orkuskipti í haftengdri starfsemi, hvort heldur sem er í gegnum Orkusjóð eða með stuðningi við umsóknir í alþjóðlega sjóði fyrir sjálfbærar lausnir. Upphaf / Endir 2020 – 2030. Staða: Í framkvæmd.
- Þrepaskipt krafa á söluaðila eldsneytis um lágmarkshlutdeild endurnýjanlegra orkugjafa sem seldir eru til fiskiskipa og í innanlandssiglingar. Upphaf / Endir 2028 – 2030. Staða: Á hugmyndastigi.
- Skipaður verður vinnuhópur sem kortleggur leiðir til að tryggja nægt aðgengi að endurnýjanlegum orkugjöfum, þ.m.t. fýsileika innlendrar framleiðslu, innflutnings og hvatakerfa. Upphaf / Endir 2024 – 2025. Staða: Á hugmyndastigi.
