Lyfjakistukostnaður stendur í smábátaeigendum
Frá því er sagt á heimasíðu Landssambands smábátaeigenda að miklar fyrirspurnir hafi borist að undanförnu til skrifstofu sambandsins vegna kostnaðar við lyfjakistur í smábátum. Þetta gerist í kjölfar nýrrar reglugerðar sem birt var í október síðastliðnum en kröfur sem þar birtast um innihald í lyfjakistu D, sem skal vera um borð í smábátum, þýða verulega aukinn kostnað við lyf- og sjúkragögn sem krafa er gerð um. Segir í umfjölluninni að mörgum smábátaeigendum hafi brugðið við lestur reglugerðarinnar.
„Talsvert áður hafði þessi fyrirhugaða breyting verið kynnt í Siglingaráði og samkvæmt henni átti breytingin að vera til einföldunar og kostnaðarminnkunar. Annað kom á daginn,“ segir í fréttinni en jafnframt að LS hafi að undanförnu unnið að því að knýja fram breytingar á reglugerðinni hvað þetta varðar. Á fundi Siglingaráðs í gær hafi síðan verið upplýst að að breytingar hafi verið gerðar á þremur liðum og þannig er dregið úr kröfum um innihald lyfjakistunnar í smábátum og kostnaður lækkar sem því nemur.