Bjarkey í Ægi: „Ég myndi vilja efla félagslega hlutann“

„Ég er búin að fara í gegnum þetta í ráðuneytinu og bað þá að leggja allt á borðið, sem nýst gæti strandveiðunum. En þetta er bara ekki svona einfalt. Byggðakvótinn er t.d. bundinn við fiskveiðiárið og í lögunum er heimild til að færa vannýtta kvótann á milli ára.“ Þetta segir Bjarkey Olsen Gunnarsdóttir, ráðherra sjávarútvegsmála, í nýju tölublaði Ægis. Í viðtalinu segist hún vilja efla strandveiðar en að hún sé bundin af löggjöfinni. Svigrúm í gegnum reglugerðarbreytingar sé mjög lítið.

Spurð hvort hún sjái fyrir sér að nota skiptimarkað með aflaheimildir til að bæta dögum við strandveiðipottinn svarar Bjarkey. „Ég er opin fyrir því að horfa til þess – þegar þar að kemur.“ Hún segist aðspurð ekki geta lofað strandveiðimönnum því að veiðarnar verði ekki stöðvaðar um svipað leyti og í fyrra.

Þegar viðtalið var tekið voru strandveiðarnar nýlega farnar af stað. Bjarkey lagði til sem þingmaður að félagslega kerfi sjávarútvegsins yrði eflt og það stækkað úr 5,3% í 8,3%. Hún hefur sérstaklega talað fyrir því að strandveiðar verði efldar. Er hún enn þeirrar skoðunar? „Já, ég myndi vilja efla félagslega hlutann. Í Auðlindinn okkar eru lagðar fram breytingar á byggðakvóta sem yrðu kannski til þess fallnar að styrkja byggðirnar. Það kom mér hins vegar á óvart þegar ég kom inn í ráðuneytið hve lítið ég get gert fyrir strandveiðar í gegnum reglugerðarbreytingar,“ segir hún.

Rætt er við Bjarkey um strandveiðar, byggðakvóta, sjókvíaeldið, almennt um kvótakerfið og samþjöppun á aflaheimildum, í viðtali í nýútkomnu tölublaði Ægis.