Hanna Katrín „Sorglegt að fylgjast með árásum SFS“

Hanna Katrín Friðriksson atvinnuvegaráðherra segir frumvarp sitt um breytingar á lögum um veiðigjöld vera „löngu tímabæra leiðréttingu“ sem tryggi þjóðinni „sanngjarnari hlutdeild í ágóðanum af nýtingu á fiskveiðiauðlind sinni“. Frumvarpið, sem nú er til umfjöllunar á Alþingi, miðar að því að hækka veiðigjöldin um 8–10 milljarða króna miðað við 2023.

Ráðherrann segir Alþingi hafa unnið málið af mikilli fagmennsku, og atvinnuveganefnd hafi mótað þrjár meginbreytingar á frumvarpinu: skýrari útreikninga, hærra frítekjumark fyrir minni fyrirtæki og að miðað verði við 80% af norsku markaðsverði við útreikninga veiðigjalda á makríl. „Við meðferð nefndarinnar kom fram að hægt væri að túlka ákvæði frumvarpsins um útreikninga veiðigjalda með mismunandi hætti,“ segir Hanna Katrín, en að óvissan hafi verið leyst með fundum með Skattinum og Fiskistofu.

Á sama tíma gagnrýnir hún harðlega framgöngu Samtaka fyrirtækja í sjávarútvegi (SFS) sem hafa sakað ráðuneytið um vankunnáttu og jafnvel blekkingar. „Síðasta sendingin er sú versta en þar er því bókstaflega haldið fram að ráðuneytið hafi reynt að afvegaleiða Alþingi. Þær gerast varla alvarlegri ásakanirnar,“ skrifar hún, og bætir við: „Það er sorglegt að fylgjast með árásum SFS á starfsfólk stjórnsýslunnar sem vinnur störf sín af fagmennsku og heilindum.“

Ráðherrann undirstrikar að frumvarpið byggi á einföldum grunni: „Að þeir sem nýta sameiginlega auðlind þjóðarinnar greiði sanngjarnt gjald fyrir það.“ Hún segir að í áraraðir hafi veiðigjaldið byggst á „undirverðlagningu úr innri viðskiptum fyrirtækja“, sem nú verði leiðrétt.

„Yfirgnæfandi meirihluti þjóðarinnar fagnar því að loksins sé komin ríkisstjórn sem er samstíga í þessu mikla réttlætismáli og setur hagsmuni almennings í forgang,“ segir hún og bætir við að það sé „grafalvarlegt mál þegar viðbragð þessara sömu hagsmunaafla er að ráðast að stofnunum ríkisins að því er virðist í þeim tilgangi að þvinga fram aðra niðurstöðu.“