Köld rauðspretta með rækjum og piparrótarsósu

Oft er gott að fá sér léttan kvöldverð svo maður liggi ekki vembilfláka langt fram eftir kvöldi og blóðflæðið verði meira til höfuðs en þarma og draumar næturinnar verði fremur á léttari nótunum. Þá kemur góður fiskur sterklega til greina og þar er rauðsprettan ansi ofarlega á blaði. Bragðið alveg einstakt. Eins og við höfum svo oft lagt til áður fyrir rómantískt fólk á öllum aldri, er gott þegar húmar að, að kveikja á kertum, eða í arninum, setja fallega tónlist á fóninn, freyðandi vín í glas og njóta réttar, sem hægt er að útbúa fyrr um daginn og taka bara úr kæli, þegar byrjar að snarka í arninum. (Þar sem arinn er kannski ekki mjög algengur, er rétt að benda á að hægt er að fá arineld með snarki og undirspili á dvd-diski til að stinga í græjurnar. Það fer langt með að virka.)
En hvað um það, þessi uppskrift er fengin útgáfu Vöku-Helgafells, Af bestu lyst. Verði ykkur að góðu.

Innihald:

500 g rauðsprettuflök
1 tsk natríumskert salt
1 tsk timijan, þurrkað
1 msk sítrónusafi
½ msk ólífuolía

Piparrótarsósa:

3 dl sýrður rjómi 10%
1 msk piparrót, rifin
3 msk ferskt dill eða 3 tsk þurrkað
3 msk graslaukur
200 g rækjur
salaltblöð eftir smekk.

Aðferð:

Hitið ofninn í 180°C. Stráið salti og timijan á fiskflökin. Penslið með sítrónusafa og rúllið þeim upp.
Smyrjið eldfast mót með olíu og raðið rúllunum þar í. Setjið álpappír yfir og bakið í 180°C heitum ofninum í 15 mínútur. Kælið.
Rífið piparrót og fínsaxið dill og graslauk. Hrærið sýrðar rjómann og blandið öllu saman. Kælið.
Raðið fallega á fat eða diska salatblöðum, fiskrúllum og sósu og stríð rækju yfir.
Berið fram með grófu brauði.