Ríflega 100.000 tonn á land í janúar

Fiskafli íslenskra skipa í janúar var 107.643 tonn. Verkfall sjómanna í ársbyrjun 2017 gerir það að verkum að ekki er hægt að bera aflabrögð fyrir janúar 2018 saman við janúar 2017.  Á 12 mánaða tímabili frá febrúar 2017 til janúar 2018 hefur heildarafli aukist um 273 þúsund tonn eða 27% samanborið við 12 mánaða tímabil ári fyrr, samkvæmt tölum Hagstofu Íslands.

Aðeins smærri bátar réru í verkfallinu í fyrra og varð heildarafli þá einungis 7.625 tonn, langmest þorskur og nokkuð af ýsu. Þegar litið er til síðustu 12 mánaða er um fjórðungsaukningu heildaraflans að ræða og hana má að langmestu leyti rekja til meiri uppsjávarafla. Á tímabilinu varð sá afli samtals 784.787 tonn, sem er 45% aukning. Hlutfallslega mest aukning varð í loðnu, en afli af henni fór úr tæplega 100.000 tonnum í 265.000 tonn, sem er vöxtur um 166%. Kolmunnaaflinn jókst um 45% en makríllandanir stóðu nánast í stað.