Lítilsháttar samdráttur í aflaverðmæti

Aflaverðmæti íslenskra skipa úr sjó nam um 9,8 milljörðum króna í nóvember sem er 3,5% minna en í nóvember 2016. Verðmæti botnfiskaflans var um 8,2 milljarðar króna og jókst um 7,4%. Af botnfisktegundum var verðmæti þorskaflans rúmir 5,2 milljarðar sem er 3,4% minna en í sama mánuði ári fyrr. Aflaverðmæti ufsa var ríflega tvöfalt hærra en í nóvember 2016, jókst um 432 milljónir. Aflaverðmæti uppsjávartegunda nam rúmum  milljarði króna samanborið við 1,9 milljarða í nóvember 2016 sem er 45% samdráttur. Verðmæti flatfiskafla voru tæplega 454 milljónir króna sem er 13,1% minna en í nóvember 2016. Verðmæti skelfiskafla dróst saman um 7,2% á milli ára, nam 84 milljónum samanborið við 91 milljón í nóvember 2016.

Á 12 mánaða tímabili frá desember 2016 til nóvember 2017 nam aflaverðmæti úr sjó tæpum 109,1 milljarði króna, sem er 19% samdráttur miðað við sama tímabil ári fyrr.

Þegar nánar er litið á þróun mála og upplýsingar Hagstofu Íslands um afla, bornar saman við verðmætið, kemur fram að fiskaflinn í nóvember var tæplega tæplega 88.000 tonn, sem var aukning um 1%. Þrátt fyrir það dregst verðmætið saman um 3,5%. Botnfiskaflinn varð samtals 44.200 tonn sem er 12% aukning, en verðmæti hans hækkar aðeins um 7,4%. Þorskaflinn var ríflega 26.700 tonn, sem 4 tonnum meira en í nóvember árið áður. Engu að síður dregst verðmætið niður um 3,4%. Skýringin á því gæti annaðhvort verið minna hlutfall  af sjófrystum fiski í aflanum eða að verð hafi almennt lækkað. Afli af ufsa í nóvember síðastliðnum var tæp 5.700 tonn sem er ríflega tvöföldun frá sama mánuði árið áður. Það skýrir rúmlega tvöföldun aflaverðmætisins.

Uppsjávarafli í umræddum mánuði varð um 31.600 tonn, sem er 12% samdráttur. Verðmæti þess afla var ríflega einn milljarður, sem er 45% minna en í sama mánuði 2016. Það voru aðeins síld og kolmunni af uppsjávartegundunum sem veiddust í nóvember. Síldaraflinn féll um fjórðung, en verðætið um helming og kann skýringin þar að vera sú sama og í þorskinum. Kolmunnaaflinn tvöfaldaðist á hinn bóginn en verðmæti hans hækkaði aðeins um 63%, sem bendir til almennrar lækkunar á verði, en kolmunninn fer allur í bræðslu.

Ljósmynd Hjörtur Gíslason