Veiðidögum á grásleppu fjölgað í 32

Von er á  reglugerð frá  Atvinnuvega- og nýsköpunarráðuneytinu þar sem fram kemur að  heimilt verður að halda úti grásleppubátum í 32 daga en ekki 20 daga eins og upphaflega var tilkynnt.

Fyrstu  grásleppubátarnir  á þessari vertíð eru  að  ná 20. degi á sunnudaginn 8. apríl.  Þeim er nú óhætt að halda áfram veiðum  í 12 daga í viðbót.  Síðasti dagur grásleppuvertíðarinnar hjá fyrstu bátunum er þá 20. apríl nk.

Hafrannsóknastofnun hefur lokið útreikningum úr mælingum rannsóknaleiðangurs sem fram fór í byrjun mars.  Leggur stofnunin til að grásleppuafli fari ekki umfram 5.487 tonn, sem er 868 tonna minnkun milli ára.

Grásleppunefnd LS hefur fundað umniðurstöður á mælingum Hafró.  Á fundinum var ákveðið að leggja til við ráðuneytið að veiðidagar á yfirstandandi grásleppuvertíð verði 40 sem er 6 dögum færra en endanleg ákvörðun varð á síðustu vertíð.  Ákvörðun nefndarinnar er byggð á veiði undangenginna tveggja ára, þar sem þess er gætt að afli fari ekki umfram tillögu Hafrannsóknastofnunar.