Fiskafli í apríl 30% meiri en í fyrra

Fiskafli íslenskra skipa í apríl var 146.742 tonn eða 30% meiri en í apríl 2017. Botnfiskafli var rúm 49 þúsund tonn sem er 23% aukning frá fyrra ári, þar af nam þorskaflinn rúmum 23 þúsund tonnum sem er 30% meiri afli en í apríl 2017. Af uppsjávartegundum veiddist nær eingöngu kolmunni, en af honum veiddust tæp 94 þúsund tonn sem er 33% meira en í apríl 2017. Skel og krabbadýraafli nam 1.607 tonnum samanborið við 824 tonn í apríl 2017.

Heildarafli á 12 mánaða tímabili frá maí 2017 til apríl 2018 var rúmlega 1.265 þúsund tonn sem er 17% aukning miðað við sama tímabil ári fyrr samkvæmt tölum Hagstofu Íslands.

Aukninguna í botnfiskafla í apríl má að miklu leyti skýra með því að páskar voru um miðjan mánuðinn í fyrra, en aðeins páskadagur og annar í páskum komu inn í byrjun apríl í ár. Hvað kolmunnann varðar ver meira sótt í hann í ár en í fyrra og aflinn góður.