„Frumvarp sem mismunar útgerðum”

Stjórn Landssambands smábátaeigenda krefst þess að tekið verði tillit til aðstöðumunar við fullvinnslu frumvarps sjávarútvegsráðherra um stjórnun veiða á makríl á komandi vertíð. Samkvæmt frumvarpinu verður makríl úthlutað samkvæmt aflareynslu á 11 ára tímabili, en fyrstu ár þess tímabils gátu smábátar ekki stundað makrílveiðar, þar sem hann gekk ekki inn á grunnslóðina.

Þessi krafa var samþykkt á stjórnarfundi LS og er samþykktin svohljóðandi:

„Frumvarp um stjórn makrílveiða hefur verið kynnt í Samráðsgátt stjórnvalda.  Þar er gert ráð fyrir að aflamarki verði úthlutað á grundvelli aflahlutdeildar samkvæmt veiðireynslu á 11 ára tímabili.

Smábátaeigendur hófu fyrst veiðar á makríl að einhverju marki árið 2013.  Tímabil veiðireynslu á hins vegar að vera 2008 – 2018.  Stjórn LS lýsir undrun yfir að hér hafi verið kynnt frumvarp sem mismunar útgerðaraðilum eftir stærð og aðstöðu til veiða.  Smábátaeigendur höfðu engin tök á að afla sér veiðireynslu á fyrri hluta tímabilsins þegar makríllinn var á fjarlægum miðum, langt utan farsviðs þeirra.

Stjórn LS krefst þess að tekið verði tillit til þessa aðstöðumunar við fullvinnslu frumvarpsins.“