Austurlenskt rækjugóðmeti

Jæja, er ekki kominn tími til að breyta til. Fáum okkur austurlenskar hlýsjávarrækjur í austurlensku mauki, grjón og naan brauð. Flottur réttur til að njóta síðdegis á sólríkum haustdegi, svokölluðu gluggaveðri. Og pæla í næstu sólarlandaferð. Við mælum með Bali, enda rétturinn upprunninn þaðan.

Innihald:

500g hráar risarækjur, skelflettar og garnhreinsaðar

1 stór laukur, gróft skorinn

1 þumlungur af engifer, flysjaður og smátt saxaður

2 stórir hvítlauksgeirar

1 msk. matarolía

2-3 msk. tikka karrí mauk

400g dós saxaðir tómatar

2 msk. tómatpúrra

½ msk. púðursykur

3 karímommustilkar

200g brún basmati hrísgrjón

3 msk. möndlukurl

1 msk. rjómi

½ knippi af freskum kóríander, gróft skorinn

heitt naan brauð

Aðferð:

Setjið lauk, engifer og hvítlauk í matvinnsluvél og maukið. Hellið matarolíunni í góðan pott á miðlungshita. Bætið laukmaukinu út í og látið malla þar til það verður gullið. Hrærið karrímaukinu út í og síðan tómötunum og tómatpúrrunni út í, síðan púðursykri og kardímommum og látið krauma í 10 mínútur.

Veiðið kardímommustilkana upp úr sósunni og hendið þeim og jafnið sósuna til með töfrasprota. Bætið þá möndlukurlinu og rækjunni út í og látið krauma í 5 mínútur. Hrærið þá rjómanum og kóríander út í.

Berið fram með grjónum og naan brauði.