Áskell sviptur veiðileyfi fyrir meiriháttar brottkast
Fiskistofa hefur svipt togarann Áskel ÞH-48 veiðileyfi í fjórtán daga fyrir meiriháttar brottkast. Myndband náðist af skipinu þar sem 74 fiskum var varpað fyrir borð á 48 mínútum. Um er að ræða brot á lögum um stjórn fiskveiða.
Landheglgisgæsla Íslands hefur kært brotin til lögreglustjórans á Suðurnesjum, hvar það verður rannsakað sem sakamál. Þetta kemur fram á vef Fiskistofu.
Myndbandið náðist á dróna sem flogið var frá varðskipi Landshelgisgæslunnar út fyrir Vestfjörðum þann 29. ágúst síðastliðinn. Fram kemur í gögnum málsins að útgerðin harmi að fiskur sem skipið hefði veiðiheimildir fyrir hefðu farið út um lensport skipsins.
