Samruni VSV, Óss og Leo Seafood samþykktur

Samkeppniseftirlitið hefur samþykkt samruna Vinnslustöðvarinnar hf., Útgerðarfélagsins  Óss hf. og Lea Seafood ehf. Samruninn var tilkynntur samkeppnisyfirvöldum 28. febrúar 2023 og niðurstaðan liggur nú fyrir. Frá þessu er greint á vef Vinnslustöðvarinnar.

Fram kemur að fyrirtækin fari með tæplega 7% af aflahlutdeild í þorskígildiskílóum, sem er undir 12% hámarki samkvæmt lögum nr. 116/2006 um stjórn fiskveiða.

Í ákvörðun Samkeppniseftirlitsins segir meðal annars: „Samkvæmt upplýsingum í málinu frá Fiskistofu munu samrunaaðilar fara með tæp 7% af aflahlutdeild í þorskígildiskílóum, sem er undir 12,0% hámarki samkvæmt lögum nr. 116/2006 um stjórn fiskveiða. Ef miðað væri við víðtækari yfirráð myndu samrunaaðilar og FISK Seafood ráða yfir 12,33% af aflahlutdeildum. Slík markaðshlutdeild gefur ekki tilefni til frekari skoðunar með hliðsjón af samkeppnislögum að mati Samkeppniseftirlitsins eins og atvikum er háttað í þessu máli. Að því sögðu fer Samkeppniseftirlitið ekki með eftirlit vegna laga um stjórn fiskveiða. Gaf Fiskistofa umsögn í málinu og gerði ekki athugasemdir við samrunann.”