Skýrsla um skilvirkari úrvinnslu gagna í sjávarútvegi

Deila:

Ráðgjafafyrirtækið Intellecta hefur skilað skýrslu til Svandísar Svavarsdóttur matvælaráðherra um fyrsta áfanga verkefnis um markvissari og skilvirkari öflun og úrvinnslu gagna í sjávarútvegi.  Meginmarkmið áfangans er að greina upplýsingamyndun við fiskveiðar, allt frá veiðiferð til útskipunar. Þetta kemur fram á vef Stjórnarráðsins.

Þar segir að í skýrslunni séu einnig greind þau tækifæri sem eru til staðar fyrir betri gagnanýtingu í sjávarútvegi. Tilgangur gagnaöflunarinnar sé jafnframt greindur og yfirlit gert um gagnavistun og -söfnun.

„Möguleikar til úrvinnslu gagna í sjávarútvegi hafa gerbreyst með tækniþróun, þ.m.t. gervigreind. Gögn eru því orðin ein af grunnforsendum nýsköpunar, stefnumótunar og ákvarðanatöku í atvinnugreininni. Mikil gagnaauðlind hefur orðið til síðustu áratugi hjá opinberum stofnunum, útgerðum, fiskmörkuðum og -vinnslum. Þau gögn hafa verið fáum aðgengileg fram til þessa, utan eigenda gagnanna, og hafa því nýst takmarkað. Eitt meginmarkmið verkefnisins er því að draga saman tækifæri og leiðir til að nýta gögnin betur til virkari stjórnsýslu, eftirlits og til eflingar rannsókna,” segir í fréttinni.

Fram kemur að næsti áfangi verkefnisins sé tæknivinna sem ætlað er sé tryggja markvissa og örugga gagnasöfnun ásamt aðgengi þeirra sem hafa heimild til notkunar gagnanna. Í samstarfi við Brim, Hafrannsóknastofnun, Fiskistofu og Intellecta sé nú unnið að því að sannreyna tæknina sem byggir á skýjalausnum. Áætlað er að niðurstöður þessa áfanga liggi fyrr í lok maí nk.

Skýrslu Intellecta má nálgast hér.

Deila: